එළඹෙන වසර දහය, පහළොව හෝ විස්ස වැනි කාලසීමාවන් තුළ ලෝකයේ තත්ත්වය කෙසේ වනු ඇත්දැයි පුරෝකථනය කළ නොහැකි අවිනිශ්චිත තත්ත්වයක් උදා වී ඇති බව සමබිම පක්ෂයේ නායක දීප්ති කුමාර ගුණරත්න ප්රකාශ කරයි.
මාධ්යවේදී නාරද බක්මීවැව මෙහෙයවන ‘අදහස් පෙරමුණ’ (Ideas Front) යූටියුබ් නාලිකාව සමඟ පැවැත්වූ සාකච්ඡාවකට එක්වෙමින් ඔහු පෙන්වා දුන්නේ සමස්ත ලෝකයේම අනාගතය මෙලෙස අවිනිශ්චිත වී ඇති පසුබිමක, ශ්රී ලංකාවේ අනාගතය නිවැරදිව පුරෝකථනය කිරීම සඳහා මෙරට විශ්වවිද්යාල පද්ධතිය ඇතුළු ආයතන අනාගත දැක්මක් සහිතව පෙළ ගැසිය යුතු බවයි.
නමුත් එවැනි විද්යාත්මක හෝ මූලෝපායික සූදානමක් මෙරට අධ්යාපන පද්ධතිය තුළ හෝ පාලන තන්ත්රය තුළ දක්නට නොමැති බව ඔහු වැඩිදුරටත් අවධාරණය කළේය.
එම සාකච්ඡාවටම සහභාගී වූ දේශපාලන විශ්ලේෂක විපුල කරුණාතිලක අදහස් දක්වමින් කියා සිටියේ, ඇමරිකාව නිරන්තරයෙන්ම උත්සාහ කරන්නේ ඉන්දියානු කලාපයේ රටවල් සහ චීනය සමඟ සබඳතා පවත්වන රටවල් දේශපාලනික හෝ ආර්ථික වශයෙන් අර්බුදයට පත් කිරීමට බවයි.
ලෝක බලවතුන්ගේ මෙම භූ-දේශපාලනික අරගලය ශ්රී ලංකාව වැනි රටවල ස්ථාවරත්වයට සෘජුවම බලපාන බව පෙන්වා දුන් ඔහු, කලාපීය බල අරගල හමුවේ රටක් ලෙස පවතින අභියෝග පිළිබඳව දීර්ඝ ලෙස විස්තර කළේය. වර්තමාන ලෝක ප්රවණතා සහ ශ්රී ලංකාව මුහුණ දෙන අනාගත අවදානම් පිළිබඳව මෙහිදී විද්වත් මට්ටමේ ගැඹුරු විග්රහයක් සිදු විය.
Leave a comment